Kristín Gunnarsdóttir og Ólöf Skaftadóttir, kóngarnir í Komið gott-hlaðvarpinu, troðfylltu Iðnó í gærkvöldi þar sem þær voru með þátt í beinni útsendingu. Hlaðvarpið hóf göngu sína í júlí og hefur síðan þá vaxið og dafnað enda eru þessir kóngar ekkert eðlilega skemmtilegir! 

Þorgerður Katrín Gunnarsdóttir, formaður Viðreisnar, var einn af heiðursgestunum í þættinum. Hún fékk sérstakt hrós fyrir að passa enn þá í 20 ára Karen Millen dragt en Smartland greindi frá því í vikunni að Þorgerður Katrín væri eins og kvenkynsútgáfan af James Bond.

Þorgerður Katrín fékk sérstaka gjöf frá Komið gott-kóngunum því þeim finnst hún ekki hafa drukkið nóg af áfengi í kosningabaráttunni. Hún fékk risa Stanley-brúsa og Muga-rauðvínsflösku sem var hellt í brúsann uppi á sviðinu. Þorbjörg Sigríður Gunnlaugsdóttir og Hanna Katrín Friðriksson, þingmenn Viðreisnar, nutu góðs af þessu og fengu sopa hjá formanninum. Gott ef Dagbjört Hákonardóttir, þingmaður Samfylkingarinnar, fékk ekki sopa líka. Á sviðinu var líka Snorri Másson, nýkjörinn þingmaður Miðflokksins, og Nadine Guðrún Yaghi eiginkona hans. 

Friðjón Friðjónsson í borgarstjórnarflokki Sjálfstæðisflokksins var líka gestur á sviðinu og líka Stefán Einar Stefánsson, sem þær kalla Sesamfræið, og svo fékk Skafti Jónsson, diplómat og faðir Ólafar, að láta ljós sitt skína í um það bil 30 sekúndur sem var of lítill tími að hans mati. Og reyndar gestanna líka. 

Svandísi Svavarsdóttur, formanni VG, var sérstaklega boðið á viðburðinn en hún komst því miður ekki því hún var í París að drekka kampavín. 

Svo var greint frá skilaboðum sem leikstjórinn Baltasar Kormákur sendi á vitlausa Lilju og fleira skemmtilegt sem ekki verður upplýst um frekar. Þátturinn mun ekki fara í loftið og var bara fyrir þessa fáu útvöldu sem höfðu vit á að kaupa sér miða því það seldist upp á viðburðinn á fjórum mínútum.