Spennusagnahöfundarnir Ragnar Jónasson og Yrsa Sigurðardóttir telja meiri líkur en minni á að ríkisstjórn Samfylkingar, Viðreisnar og Flokks fólksins komist á koppinn.

Þetta kemur fram í nýju viðtali við þau á vettvangi Spursmála þar sem farið er yfir fréttir vikunnar.

Flottir leiðtogar

Yrsa bendir á að leiðtogar flokkanna þriggja séu mjög flottir, hins vegar sé ljóst að ýmislegt ber í milli þegar kemur að því að bera saman kosningaloforðin fyrir kosningar.

„En ef einhverjum tekst að koma þessu saman og lenda þessu þá eru það þessar þrjár konur,“ segir Yrsa.

Ragnar telur óvíst að þetta stjórnarmynstur hafi verið skrifað í skýin. Meiri líkur séu á að þessi staða hafi komið upp þegar talið var upp úr kössunum.

Magnað ef tekst í fyrstu umferð

„Það væri alveg magnað ef þetta næðist í fyrstu umferð. Við höfum séð stjórnarmyndanir af þessu tagi ganga mun erfiðlegar,“ segir Ragnar.

Þegar þau eru spurð að því hver hinna þriggja valkyrja verði næsti forsætisráðherra segir Yrsa að það sé væntanlega Kristrún Frostadóttir. Ragnar er ekki eins viss. Bendir hann á að Þorgerður hafi fleiri kosti í stöðunni og það gæti hjálpað til við að fleyta henni í embætti forsætisráðherra.

Viðtalið við þau tvö má sjá í heild sinni í spilaranum hér að neðan: