Að minnsta kosti 104 eru látnir í flóðum af völdum mikilla rigninga í Nepal. 64 er enn saknað.
Heilu hverfin eru á kafi í Kathmandu, höfuðborg landsins, og þá hafa orðið miklar eyðileggingar á þjóðvegum Nepal.
Hinn fertugi Kumar Tamang, sem býr í fátækrahverfi við árbakka, sagði við AFP-fréttaveituna að fjölskylda hans hefði flúið um miðnætti eftir að vatn byrjaði að flæða inn á heimili hans.
„Í morgun komum við aftur heim og þá leit allt öðruvísi út,“ sagði Tamang.
„Við gátum ekki opnað útidyrahurðina, hún var föst undan drullu. Í gær óttuðumst við að vatnið myndi drepa okkur, en í dag höfum við ekkert vatn til að þrífa.“
Að minnsta kosti 14 þeirra sem létu lífið voru í rútum er vatnið flæddi að suður af höfuðborginni.
Um er að ræða mestu úrkomu sem hefur mælst í höfuðborginni síðan árið 1970.