Vilja fá fjármálaupplýsingar án dómsúrskurðar

Stofna á sérstaka einingu hjá embætti héraðssaksóknara sem mun hafa leiðandi hlutverk á landsvísu til að efla getu yfirvalda til að endurheimta ávinning af glæpum, þ.e. svokallað illa fengið fé eða illa fenginn ágóða af glæpastarfsemi. Á einingin að aðstoða lögregluembætti og hafa umsjón yfir haldlögðum og kyrrsettum eignum.

Þá verða heimildir lögreglu auknar þegar kemur að haldlagningu og rannsókn á eignum þeirra sem til rannsóknar eru einnig.

Þetta er á meðal þess sem kveðið er á um í nýju frumvarpi Þorbjargar Sigríðar Gunnlaugsdóttur dómsmálaráðherra, en frumvarpið er nú til umsagnar í samráðsgátt stjórnvalda og er umsagnarfrestur til 12. mars.  

Í tilkynningu á vef Stjórnarráðsins kemur fram að samhliða stofnun einingarinnar verða eftirtaldar breytingar lagðar til:

• Að við rannsókn hafi lögregla heimild til að óska eftir upplýsingum hjá fjármálafyrirtækjum án dómsúrskurðar.
• Að unnt verði að haldleggja eignir til tryggingar greiðslu sekta og sakarkostnaðar, sem og að tryggja réttindi ríkisins í eignum sem lögregla hefur kyrrsett.
• Að heimilt verði að dæma einstaklinga til að greiða fjárhæð sem nemur ávinningi af broti, ef haldlögð verðmæti duga ekki til.
• Að reglur um upptöku ávinnings verði í þeim tilvikum er upptökuþoli er látinn, ekki er vitað hver hann er eða hann finnst ekki.

„Þetta frumvarp er nýtt og mikilvægt skref í baráttunni við skipulagða glæpastarfsemi sem er áherslumál þessarar ríkisstjórnar,“ er haft eftir Þorbjörgu í tilkynningunni. Jafnframt er þar haft eftir henni að frumvarpið auki skilvirkni lögreglu til að sinna því hlutverki að endurheimta illa fenginn ágóð. „Það er stefna okkar að taka fast á skipulagðri glæpastarfsemi.“

Tekið er fram í tilkynningunni að með frumvarpinu sé verið að færa regluverk til betra samræmis við regluverk á hinum Norðurlöndunum og að það sé einnig liður í að uppfylla alþjóðlegar skuldbindingar.

• Blogga um frétt