Lögguskortur

Íbúar þurfa að geta treyst því að nauðsynlegt viðbragð sé til staðar, hvort sem um ræðir heilsugæslu, slökkvilið eða lögreglu. Þrátt fyrir þessa mikilvægu þætti hefur löggæsla í mörgum sveitarfélögum dregist saman, jafnvel þó að á sama tíma hafi samfélögin sjálf upplifað fordæmalausa uppbyggingu. Misræmið á milli vaxandi samfélags og minnkandi löggæslu er orðið alvarleg ógn við öryggistilfinningu íbúa og gesta Mýrdalshrepps.

Aldrei meiri umsvif í Vík

Á síðustu árum hefur Vík í Mýrdal vaxið hratt, bæði í ferðaþjónustu og uppbyggingu á innviðum. Ferðamenn dvelja nú lengur og njóta aukins framboðs á afþreyingu, gistingu og þjónustu. Tölur tala sínu máli – fjöldi ferðamanna hefur margfaldast og ferðaþjónustan orðin stærsta atvinnugrein svæðisins.