Landsþing Kvenfélagasambands Íslands, hið 40. í röðinni, var sett í Ísafjarðarkirkju í gærkvöldi. Fjöldi kvenna mætti þar í þjóðlegum klæðnaði, eins og þær höfðu verið hvattar til. Alls eru rúmlega 220 kvenfélagskonur af öllu landinu skráðar á landsþingið, sem haldið verður á Ísafirði um helgina.
Að lokinni þingsetningu í kirkjunni héldu konurnar yfir í Edinborgarhúsið í móttöku, en þar verður þingið haldið í dag og á morgun. Sýning á þjóðbúningum og erindi um sögu þeirra verður einmitt hluti dagskrár vinnustofu í dag, en áhugi á búningnum hefur aukist verulega hin síðari ár.
Á morgun munu kvenfélagskonur m.a. ræða stöðu kvenna af erlendum uppruna.