— Morgunblaðið/Þorgeir Baldursson
Skíðasvæðið í Hlíðarfjalli á Akureyri var loksins opnað á laugardagsmorgun, í fyrsta skipti í vetur, við mikinn fögnuð skíðafólks fyrir norðan. Ekki hefur verið hægt að opna skíðasvæðið fyrr vegna snjóleysis, en svæðinu er nánast að fullu haldið gangandi með snjóframleiðslu.
Brynjar Helgi Ásgeirsson forstöðumaður Hlíðarfjalls segir aðsóknina hafa farið vel af stað og telur um 1.100-1.200 gesti hafa verið á skíðasvæðinu á laugardag, sem teljist nokkuð gott.
„Við höfum bara verið að framleiða snjó og fólk hefur verið að bíða spennt. Venjulega náum við að opna fyrst af skíðasvæðunum, eða með þeim fyrstu, en þetta hefur verið pínu spes vetur fram að þessu,“ segir Brynjar.