Ólafur Pálsson
olafur@mbl.is
Stjórnendur Arion banka tilkynntu Íslandsbanka formlega í gær um áhuga sinn á að efna til viðræðna um samruna bankanna og að hefja sameiginlega vinnu við að meta tækifæri til verðmætasköpunar sem í samruna felast, eins og það er orðað í bréfi þeirra til stjórnenda Íslandsbanka.
Markmiðið er aukin skilvirkni sem á að skila sér í beinum ávinningi fyrir hluthafa og viðskiptavini með lægra verði og betri þjónustu. Bankinn segist tilbúinn að vinna náið með Samkeppniseftirlitinu og tryggja að minnst 5 milljarðar af sparnaði skili sér á ári til neytenda í formi lægri kostnaðar.
Íslandsbanka er gefinn 14 daga frestur til að svara því hvort stjórn hans sé reiðubúin að taka þátt í viðræðum en tekið er fram í bréfinu að sjálfsagt sé að laga tímafrestinn að þörfum bankans sé þess óskað.
...