Haukar gerðu sér lítið fyrir og unnu slóvenska liðið Jeruzalem Ormoz í Slóveníu, 31:26, á laugardag og tryggðu sér þar með sæti í átta liða úrslitum Evrópubikars karla í handbolta. Valur er ríkjandi meistari í keppninni en tók þátt í Evrópudeildinni á þessu tímabili.
Haukar fóru með átta marka forystu inn í seinni leikinn í 16-liða úrslitum eftir að hafa unnið fyrri leikinn á Ásvöllum, 31:23. Haukar unnu því einvígið samanlagt með þrettán marka mun, 62:49.
Haukar voru með undirtökin allan leikinn á laugardag og komust mest níu mörkum yfir í stöðunni 29:20. Haukaliðið gaf aðeins eftir í lokin sem kom ekki neitt að sök.
Össur Haraldsson var markahæstur Hauka á laugardag en hann skoraði sex mörk úr átta skotum. Þá skoruðu Geir Guðmundsson og Þráinn Orri Jónsson fjögur mörk hvor. Aron Rafn Eðvarðsson var góður í marki Hauka en hann varði 11 skot.