Bandaríski stórleikarinn Gene Hackman og eiginkona hans Betsy Arakawa fundust látin á heimili sínu í Nýju-Mexíkó. Dánarorsök lá í gær ekki ljós fyrir, en lögreglan segir andlátin í rannsókn.
Eugene Allen Hackman fæddist í San Bernardino í Kaliforníu 30. janúar 1930, sonur hjónanna Eugene Ezra Hackman og Önnu Lydu Elizabeth. Fjölskyldan flutti reglulega á milli staða þegar Hackman var drengur en bjó þó lengst af í Danville í Illinois. Foreldrarnir skildu þegar hann var 13 ára.
Einungis 16 ára gamall flutti Hackman úr húsnæði móður sinnar, skráði sig til herþjónustu og gerðist landgönguliði. Gegndi hann þeirri þjónustu í hálft fimmta ár, lengst af sem fjarskiptasérfræðingur. Var hann þá m.a. staðsettur á herstöðvum Bandaríkjanna á Havaí og í Japan.