— Morgunblaðið/Þorgeir Baldursson
Nokkur veðurblíða hefur verið norðan heiða að undanförnu, svo mikil að snjómokstur hefur verið gott sem enginn á Akureyri. Hins vegar hafa menn í nægu að snúast við að þrífa upp bæði salt og sand af götum bæjarins. Þessi bíll var á ferðinni um Drottningarbrautina um miðjan dag í gær með talsverða bílalest á eftir sér er hann gerði brautina hreina.
Þótt snjólítið sé í bænum er enn hægt að skíða í Hlíðarfjalli og hefur verið nóg að gera á skíðasvæðinu. Útlit er fyrir áframhaldandi hlýindi á Norðurlandinu í dag og næstu daga. Samkvæmt veðurspá verður allt að fimm stiga hiti á Akureyri í dag og á morgun. Með því er spáð nokkru hvassviðri og úrkomu svo ólíklega verður hægt að tala um blíðviðri.