Stefán Gunnar Sveinsson
sgs@mbl.is
Kínverski rafbílaframleiðandinn XPeng hefur farið sístækkandi á síðustu árum, svo eftir hefur verið tekið. Fyrirtækið, sem fagnar nú tíu ára afmæli, hefur á síðustu þremur árum hafið innreið sína á Evrópumarkaðinn og stendur hún nú sem hæst. Segir það sína sögu um framtíðarhorfur XPeng að evrópski bílarisinn Volkswagen ákvað á síðasta ári að fjárfesta í fyrirtækinu fyrir 700 milljónir evra.
XPeng-rafbílarnir eru nú nýkomnir í sölu hér á Fróni, en á meðal þess sem boðið er þar upp á er krúnudjásnið þeirra, XPeng G9-sportjeppinn. Bíllinn er einkar glæsilegur að allri gerð og hönnun, enda kostar hann nýr með öllu 11.490.000 krónur. Verðið er hátt, en þó sambærilegt og samkeppnishæft við bíla frá evrópskum bílaframleiðendum.