Jón Gunnarsson fyrrverandi ráðherra mætir Þórdísi Kolbrúnu Reykfjörð Gylfadóttur, utanríkisráðherra og varaformanni Sjálfstæðisflokksins, í pólitísku einvígi í nýjasta þætti Spursmála. Er þetta í fyrsta sinn sem þau mætast eftir að hún tilkynnti framboð sitt, en bæði ætla þau sér annað sætið á lista Sjálfstæðisflokksins í Kraganum. Jón vermdi annað sætið á lista Sjálfstæðisflokksins í Suðvesturkjördæmi í síðustu kosningum. Þórdís Kolbrún var í fyrsta sæti listans í Norðvestur en mun nú færa sig um kjördæmi. Jón hyggst ekki gefa sætið eftir og kosið verður milli þeirra á kjördæmisþingi sem haldið verður á morgun, sunnudag. Einnig mæta Stefán Pálsson, sagnfræðingur og varaborgarfulltrúi Vinstri-grænna, og Sonja Lind Estrajher Eyglóardóttir aðstoðarmaður heilbrigðisráðherra í settið til að ræða nýjustu vendingar á vettvangi stjórnmálanna.