Morgunblaðið | 23.6.2003 | 5:30 | Uppfært 6:32

Fundur um varnarsamning Íslands og Bandaríkjanna í dag

Í dag klukkan níu hefst fundur í utanríkisráðuneytinu við Rauðarárstíg um framkvæmd tvíhliða varnarsamnings Íslands og Bandaríkjanna.

Gunnar Snorri Gunnarsson, ráðuneytisstjóri í utanríkisráðuneytinu, fer fyrir samningaliði Íslands. Aðrir í hópnum eru m.a. Albert Jónsson, forsætisráðuneyti, Sturla Sigurjónsson, skrifstofustjóri varnarmálaskrifstofu utanríkisráðuneytisins, og Helgi Ágústsson, sendiherra Íslands í Washington. Gert er ráð fyrir að fundinum ljúki um eða eftir hádegi.

Fundurinn er haldinn í beinu framhaldi af bréfaskiptum Davíðs Oddssonar, forsætisráðherra, og George W. Bush, forseta Bandaríkjanna.

Gunnar Snorri segir að á fundinum muni fulltrúar ríkjanna gera grein fyrir afstöðu ríkisstjórna sinna.

Í sendinefnd Bandaríkjanna verða fulltrúar frá bæði utanríkisráðuneyti og varnarmálaráðuneyti auk þess sem fulltrúi þjóðaröryggisráðsins, sem heyrir beint undir forsetann í Hvíta húsinu, verður með í för. "Frá bandaríska varnarmálaráðuneytinu koma bæði fulltrúar ráðuneytisins sjálfs og aðilar úr hernum," segir Gunnar.

Ekki óvenjulegt að senda svo fjölmenna sendinefnd

Í gærkvöldi hafði endanlegur þátttakendalisti Bandaríkjamanna ekki borist og ekki var ljóst hvort fulltrúar varnarliðsins á Keflavíkurflugvelli yrðu í sendinefndinni.

Aðspurður sagðist Gunnar Snorri ekki telja óvenjulegt að Bandaríkjamenn sendu svo fjölmenna sendinefnd til Reykjavíkur. Hann sagði hins vegar að þátttaka fulltrúa Hvíta hússins væri að nokkru leyti óvenjuleg.