Morgunblaðið | 5.8.2006 | 5:30 | Uppfært 8:12

Fundir HS í Norfolk skiluðu litlu

"VIÐ HEFÐUM viljað klára og vera búnir með þetta mál en það væri í raun og veru óeðlileg bjartsýni," segir Júlíus Jónsson, forstjóri Hitaveitu Suðurnesja (HS), eftir viðræður við fulltrúa bandarískra stjórnvalda um kröfur hitaveitunnar til varnarliðsins á Keflavíkurflugvelli.

Engin niðurstaða kom fram á fundunum tveimur sem fóru fram á miðvikudag og fimmtudag. Viðræðurnar snerust aðallega um kröfugerð hitaveitunnar, t.a.m. um þær fjárfestingar sem HS réðst í til að uppfylla samningsskyldur sínar við varnarliðið, sem skila litlu eftir brotthvarf hersins.

Framhaldsviðræður

"Það var verið að fara yfir þetta og útskýra svo að báðir aðilar viti um hvað málið snýst. Síðan er stefnt að því í vikunni næstu eða þarnæstu að farið verði í að skiptast á frekari skýringum og hugmyndum," segir Júlíus. Ekki hefur verið ákveðið hvenær né hvar næsti fundur verður haldinn en gert er ráð fyrir að klára málin sem fyrst.

Júlíus segist ekki geta gefið upp hversu langt sé í samkomulag milli aðila en er jákvæður á að gagntilboð berist frá bandarískum yfirvöldum, jafnvel í þessum mánuði. "Þeir vita hvar við stöndum en fulltrúarnir sem við áttum viðræður við höfðu í raun ekki neitt umboð til þess að ganga til samninga. Þeir áttu frekar að "ganga í skrokk" á okkur og fá skýringar á ýmsum atriðum."