Morgunblaðið | 19.2.2009 | 12:08

Stefnir á efstu sætin hjá Samfylkingunni

Jónína Rós Guðmundsdóttir,

Jónína Rós Guðmundsdóttir, framhalsskólakennari og formaður bæjarráðs Fljótsdalshéraðs, hefur ákveðið að gefa kost á sér í 1. – 2. sæti á lista Samfylkingarinnar í Norðausturkjördæmi fyrir komandi alþingiskosningar.

Jónína Rós er fimmtug, þriggja barna móðir og býr á Egilsstöðum með tveimur yngri börnum sínum þeim Guðmundi Þorsteini, 21 árs og Berglindi Rós, 14 ára. Elsta dóttirin Guðbjörg Anna, 24 ára, leggur stund á lögfræði við HR. Guðbjörg Anna á þriggja ára dóttur, Karen Rós.

Jónína Rós er fædd og uppalin í Hafnarfirði, lauk kennaranámi við KHÍ vorið 1982 og flutti þá um haustið á Hallormsstað og hóf kennslu við Hallormsstaðaskóla. Þar starfaði hún til ársins 2001 er hún flutti til Egilsstaða og hefur síðan kennt síðan við Menntaskólann á Egilsstöðum.

Jónína Rós hefur lokið BA prófi í sérkennslufræðum og er nú í mastersnámi í þeirri grein.

Hún situr í bæjarstjórn Fljótsdalshéraðs og hefur gegnt formennsku í Skipulags- og byggingarnefnd og verið formaður bæjarráðs frá áramótum 2007. Áður hafði hún setið í fræðslunefnd og er nú stjórnarformaður Vísindagarðsins á Egilsstöðum og nýsköpunarsjóðsins Fjárafls sem styrkir nýsköpunarstarf í dreifbýli Fljótsdalshéraðs, auk þess er hún formaður Svæðisráðs um málefni fatlaðra á Austurlandi, situr í Umferðarráði og Samgöngunefnd sambands sveitafélaga á Austurlandi.

Jónína Rós á sæti í flokkstjórn Samfylkingarinnar og í varastjórn kjördæmisráðs Samfylkingarinnar í Norðausturkjördæmi.