Ferja bílaleigubíla yfir Múlakvísl
Setja bókamerki
Byrjað var að ferja bíla yfir Múlakvísl í dag en það er gert að frumkvæði nokkurra bílaleiga. Að sögn Vilhjálms Sigurðssonar, hjá bílaleigunni Avis, tóku bílaleigurnar sig saman um að leigja stóran bíl af björgunarsveitinni Víkverji í Vík í Mýrdal sem flytur bílaleigubíla yfir Múlakvísl.
Fyrsti bíllinn var ferjaður yfir um fimmleytið í dag en stefnt er að því að lengja björgunarsveitarbílinn í nótt svo hægt verði að flytja tvo bíla yfir ána í einu.
Vilhjálmur segir að fjölga þyrfti stórum bílum sem gætu flutt bíla yfir ána þar sem mikill þrýstingur sé á það frá útlendum ferðaskrifstofum að þeirra ferðamenn komist leiðar sinnar á ferð sinni um Ísland.
Hann segir að það hafi hins vegar valdið vonbrigðum meðal starfsmanna bílaleiga hversu hægt framkvæmdir ganga við Múlakvísl þrátt fyrir fögur fyrirheit um slíkt.
/frimg/7/34/734314.jpg)
