Morgunblaðið | 13.7.2011 | 15:58 | Uppfært 8.7.2014 21:14

Jarðýta tryggir öryggi

Bifreiðin frá hópferðafyrirtækinu Sæmundi sem Vegagerðin notar nú til fólksflutninga yfir Múlakvísl. mbl.is/Jónas

Vegagerðin hefur útbúið öflugra vað á Múlakvísl eftir óhapp, sem varð í gær þegar rúta með ferðamenn festist í ánni. Jarðýta er stöðugt í vaðinu til að tryggja öryggi bifreiða.

Flutningar fólks og fólksbíla hófust aftur í morgun eftir hlé frá því í gær vegna óhappsins og ganga þeir vel, samkvæmt stöðuskýrslu frá Almannavörnum.

Til stendur að bæta fjórða sérútbúna vörubílnum við flutningana og hefur tekist að útvega enn öflugri langferðabifreið í flutninga með fólk yfir Múlakvísl. Bílarnir eru í stöðugum flutningum yfir ána.