Morgunblaðið | 7.6.2012 | 12:37 | Uppfært 14:03

Nærri sjötíu skip og 1000 sjómenn komin í höfnina

Mynd 1 af 6 Drangavík VE-80 frá Vestmannaeyjum siglir inn í Reykjavíkurhöfn í morgunsárið. mbl.is/Ómar

Mynd 2 af 6 Reykjavíkurhöfn er að fyllast af skipum. Myndin er tekin úr Hörpu. mbl.is/Ómar

Mynd 3 af 6 Um 60-70 skip eru nú við Reykjavíkurhöfn. mbl.is/Ómar

Mynd 4 af 6 Reykjavíkurhöfn er vinsæll áfangastaður fiskiskipa í dag. mbl.is/Ómar

Mynd 5 af 6 Við landfestar. Bátur við bát við Reykjavíkurhöfn. mbl.is/Ómar

Mynd 6 af 6 Skip við skip við Reykjavíkurhöfn. mbl.is/Ómar

„Skipin eru núna á milli 60 og 70 í Reykjavíkurhöfn. Þetta gengur áfallalaust fyrir sig og þetta stokkast vel upp,“ segir Halldór Valdemarsson hafnsögumaður hjá hafnsöguvakt Reykjavíkurhafna. „Við búumst við nokkrum skipum í viðbót framyfir hádegi, en lunginn af skipunum er kominn í höfn.“ Þá hafa nokkur skip komið til Hafnafjarðar.

Með skipunum sem komið hafa til hafnar í dag eru um þúsund sjómenn. Mikill erill er á höfninni og mikið af fólki hefur safnast þar saman. Halldór segir þetta mjög óvenjulegt og svona sé þetta ekki á hverjum degi. Margir eru forvitnir um þetta og skipin vekja áhuga hjá mörgum.

Tilefnið er samstöðufundur sjávarútvegsins sem haldinn verður á Austurvelli kl. 16 í dag. Fundurinn er haldinn til að hvetja Alþingismenn til að hlusta á sjónarmið sjávarútvegsins og hafa samvinnu við greinina og sérfræðinga á sviði sjávarútvegsmála við að leiða til lykta deilur um fiskveiðistjórnun og veiðigjöld. Búist er við fjölda fólks á fundinn.

Hægt er að fylgjast með beinni útsendingu frá Reykjavíkurhöfn hér.