Flaggað í hálfa stöng í Bandaríkjunum
Setja bókamerki
Kennsl hafa verið borin á manninn sem skaut 12 manns til bana og særði 59 á miðnætursýningu á nýjustu Batman-myndinni í bænum Aurora í Colorado seint í gærkvöldi.
Um er að ræða 24 ára gamlan doktorsnema í taugavísindum, að nafni James Holmes. Talið er að hann hafi verið einn að verki. Samkvæmt upplýsingum lögreglu hafði James ekki komist í kast við lögin áður ef frá er talin umferðarsekt fyrir of hraðan akstur árið 2011 að sögn AFP-fréttaveitunnar.
Að sögn vitna hóf Holmes árásina í kvikmyndahúsinu með því að kasta tveimur táragassprengjum inni í salnum og hóf í kjölfarið skothríð á kvikmyndagesti. Að sögn lögreglu var maðurinn vopnaður riffli, haglabyssu og tveimur skammbyssum auk þess að vera með gasgrímu á höfði.
Viðbúnaður við heimili árásarmannsins
Þegar lögregla kom að heimili James kom í ljós að komið hafði verið fyrir ýmsum gildrum í íbúðinni, m.a. sprengigildrum en kveikiþræðir lágu um gólf íbúðarinnar. Rýmdu lögregluyfirvöld íbúðarblokkina auk fimm nærliggjandi bygginga í öryggisskyni og notast nú við stiga slökkviliðsbíla og myndavélar til að rannsaka íbúðina.
Öryggi í kvikmyndahúsum hert
Öryggi hefur verið hert í kvikmyndahúsum sem sýna nýjustu Batman-myndina, The Dark Knight Rises, víðsvegar um Bandaríkin. Þá hefur frumsýningu myndarinnar í París verið aflýst.
Flaggað í hálfa stöng næstu daga
Barack Obama, forseti Bandaríkjanna, hefur fordæmt árásirnar auk þess sem hann hefur fyrirskipað að fánum við opinberar byggingar í Bandaríkjunum skuli flaggað í hálfa stöng næstu sex daga, eða til sólarlags þann 25. júlí næstkomandi, til að heiðra minningu hinna látnu.
