Morgunblaðið | 5.9.2012 | 5:30

Makrílvertíð ársins er langt komin

Makríll, fiskurinn sem allt snýst um.

Makrílvertíð ársins er langt komin og eftir er að veiða um tólf þúsund tonn af tæplega 150 þúsund tonna kvóta. Útgerðarmaður sem rætt var við í gær sagði að ekkert lát hefði verið á veiðum síðan í júnímánuði og veður verið með eindæmum gott þar til í gær.

Veiðar og vinnsla hefðu gengið jafnt og þétt í allt sumar. Makríllinn hefur veiðst norðarlega upp á síðkastið og hafa skipin meðal annars verið að veiðum djúpt út af Héraðsflóa. Ekkert fararsnið virðist vera á makrílnum sem þar hefur verið.

Í umfjöllun um makrílveiðina í Morgunblaðinu í dag kemur fram, að útgerðir uppsjávarskipa geyma heimildir í makríl til að nýta með norsk-íslensku síldinni, en veiðar á henni taka nú við af auknum krafti. Útlit er fyrir að gott verð fáist fyrir síldarafurðir í vetur, en makríll gaf hins vegar nokkuð eftir í ár miðað við það verð sem fékkst í fyrra.