Morgunblaðið | 6.12.2012 | 19:33 | Uppfært 22.3.2013 17:29

Herjólfur væntanlegur úr slipp 11. des.

mbl.is/GSH

Áætlað er að Herjólfur komi úr slipp í Hafnarfirði 11. desember, þriðjudaginn í næstu viku og að hann verði kominn í þjónustu daginn eftir.

Þetta segir Ólafur William Hand, upplýsingafulltrúi Eimskips, en leggur áherslu á að þessar dagsetningar miði við að allt gangi eftir.

Herjólfur fór í slipp eftir að bakborðsstýri og -skrúfa skemmdust er hann rakst í vestari hafnargarðinn við Landeyjahöfn fyrir tæpum tveimur vikum. Vinna við viðgerð á skrúfublöðum bakborðsskrúfu hefur tekið lengri tíma en búist var við, en eitt blað brotnaði og þrjú löskuðust.

Jafnframt snerist stýrið lítillega bakborðsmegin.

[Fara efst á síðu]