Morgunblaðið | 22.8.2013 | 23:16 | Uppfært 31.8.2013 18:01

44.000 undirskriftir hafa safnast

Friðrik Pálsson, hótelhaldari, og Njáll Trausti Friðbertsson, flugumferðarstjóri, eru formenn félagsins Hjartað í Vatnsmýri mbl.is/Eggert Jóhannesson

Hópurinn Hjartað í Vatnsmýrinni hefur safnað ríflega 44 þúsund undirskriftum frá því hópurinn hóf undirskriftasöfnun til stuðnings áframhaldandi veru Reykjavíkurflugvallar í Vatnsmýrinni.

Söfnunin hófst um síðustu helgi en ráðgert er að afhenda undirskriftirnar 20. september nk. þegar frestur til þess að gera athugasemdir við aðalskipulag Reykjavíkurborgar rennur út. Í aðalskipulaginu er gert ráð fyrir því að flugvöllurinn víki fyrir blandaðri byggð á næstu árum.

Söfnunin fer fram á heimasíðu hópsins, lending.is, en þar er skorað á Reykjavíkurborg og Alþingi að „tryggja öllum landsmönnum óskerta flugstarfsemi í Vatnsmýri til framtíðar.“