Morgunblaðið | 11.8.2014 | 10:29

Enn einn hálshöggvinn í Sádi-Arabíu

Deera torgið í borginni Riyadh hefur oft verið vettvangur fullnustu dauðarefsinga, þar sem fólk er hálshöggvið fyrir allra augum. Ljósmynd/Wikipedia

Maður var hálshöggvinn í Sádi-Arabíu í dag fyrir að myrða eiginkonu sína með exi fyrir framan dóttur þeirra. Dauðarefsingu var beitt í málinu vegna þess hve „viðbjóðslegt“ brotið þótti samkvæmt tilkynningu frá innanríkisráðuneyti landsins.

Með aftökunni í dag hafa 23 slíkar verið framkvæmdar í landinu í ár, en samkvæmt Mannréttindanefnd Sameinuðu þjóðanna hefur notkun dauðarefsingar tekið kipp í landinu undanfarið. 78 aftökur voru framkvæmdar í fyrra, en meðal brota sem líflátsdómur liggur við eru nauðgun, morð, vopnuð rán og eiturlyfjasmygl.