Morgunblaðið | 12.11.2014 | 11:43

„Ekki hægt að vera bjartsýnn“

Læknar að stöfum. Rax / Ragnar Axelsson

Skurðlæknafélag Íslands fundaði í morgun með samninganefnd ríkisins vegna kjaradeilunnar sem nú stendur yfir. Viðsemjendur komust lítt áfram og var fundi slitið eftir nokkrar mínútur. Næsti fundur er ekki boðaður fyrr en eftir viku.

Að sögn Helga Kjartans Sigurðarsonar, formanns Skurðlæknafélags Íslands, hafði samninganefnd ríkisins ekkert fram að færa á fundinum. „Það voru engin tilboð og ekkert lagt fram. Þetta var skammur fundur og samninganefnd ríkisins hafði ekkert fram að færa.“

Engar verkfallsaðgerðir standa yfir hjá skurðlæknum í þessari viku, en næsta lota mun hefjast aðfaranótt þriðjudagsins 18. nóvember. „Þetta er sorglegt,“ segir Helgi. „Það er ekki hægt að vera bjartsýnn í þessari stöðu.“

Tæplega 90 læknar eru í félaginu og falla allar skipulagðar aðgerðir niður þá daga sem verkfallið stendur yfir. Aðeins bráðatilvikum verður sinnt þessa daga.

Eins og fram hefur komið fer Skurðlæknafélag Íslands fram á upp undir 100% hækkun á grunnlaunum nýútskrifaðra sérfræðinga í kjaraviðræðum við ríkið.

Félagið fer fram á að laun skurðlækna hér á landi verði svipuð og þau eru í nágrannalöndunum. Ekki er óalgengt að nýútskrifaður sérfræðingur í Svíþjóð fái 60 til 70 þúsund sænskar í laun á mánuði, en það er rétt rúm milljón í íslenskum krónum. Nýútskrifaður sérfræðingur á Íslandi er með um hálfa milljón í grunnlaun.