Morgunblaðið | 17.11.2014 | 10:58 | Uppfært 12:21

Afboða börn í læknisskoðanir

Aðeins bráðatilvikum er sinnt á heilsugæslustöðvum höfuðborgarsvæðsins í dag. Golli / Kjartan Þorbjörnsson

Fjöldi læknisskoðana hefura fallið niður eða verið frestað á heilsugæslunni í Glæsibæ í morgun. Þar á meðal hefur þurft að afboða börn í ung- og smábarnavernd þar sem læknisskoðanir koma við sögu.

„Þetta getur valdið óþægindum fyrir foreldra. Þetta eru yfirleitt uppundir klukkutíma skoðanir svo fólk er yfirleitt búið að taka sér frí í vinnu og tala við leikskólann,“ segir Sigrún Barkardóttir, hjúkrunarfræðingur á heilsugæslustöðinni í Glæsibæ.

Verkfall lækna í Læknafélagi Íslands hófst á miðnætti í nótt og eru læknar á heilsugæslustöðvum höfuðborgarsvæðisins meðal þeirra sem fara fyrstir í verkfall. Þess má geta að læknavaktin á Smáratorgi er opin í dag frá 17 í dag líkt og aðra daga.

Á heilsugæslustöðinni í Glæsibæ eru að jafnaði fimm læknar að störfum á virkum degi, þar af einn yfirlæknir. Í dag og á morgun mætir aðeins yfirlæknirinn til starfa og sinnir hann aðeins bráðatilfellum. Þetta geta til dæmis verið tilvik þar sem sjúklingur kemur á stöðina með verk fyrir brjósti eða mikla kviðverki.

Starfsemi óbreytt hjá hjúkrunarfræðingum

Starfsemin er þó nánast óbreytt hjá hjúkrunarfræðingum og töluvert mikið er að gera í hjúkrunarmóttöku.

„Allar læknamóttökur raskast og allar þær heimsóknir sem þarfnast lyfjagjafar,“ segir Sigrún. „En það er nóg að gera eins og venjulega í hjúkrunarmóttökunni.“

Aðeins lífsnauðsynleg lyf endurnýjuð

Þá eru aðeins lífsnauðsynleg lyf endurnýjuð á heilsugæslustöðinni, eins og öðrum heilsugæslustöðvum höfuðborgarsvæðisins. Yfirlæknir sér um endurnýjanir vegna neyðartilvika, líkt og á insúlíni og hjarta- og krabbameinslyfjum.

Þrátt fyrir röskunina á starfseminni segir Sigrún fólk mjög tillitssamt og rólegt yfir verkfallinu.