Morgunblaðið | 17.11.2014 | 11:49

Fólk sýnir verkfallinu skilning

Heilsugæslan í Garðabæ. Gísli Sigurðsson

Ekkert einasta erindi hefur komið á borð yfirlæknis á heilsugæslustöðinni í Garðabæ í dag. Ekki hefur verið mikið að gera á stöðinni í dag, en svo virðist sem upplýsingar um yfirvofandi verkfallsaðgerðir hafi komist vel til skila til íbúa Garðabæjar.

Verkfall lækna í Læknafélagi Íslands hófst á miðnætti í nótt og leggja læknar á heilsugæslustöðvum höfuðborgarsvæðisins niður störf til miðnættis aðfaranótt miðvikudags.

„Fólk virðist átta sig á því að heimilislæknar séu ekki að störfum í dag og væntanlega á morgun líka,“ segir Bjarni Jónasson, yfirlæknir stöðvarinnar. „En það verður auðvitað heilmikil röskun á högum fólks þegar það kemst ekki til læknis.“

Þá segir hann fólk sýna verkfallinu skilning.

Sinna aðeins tilfellum sem ekki þola bið

Læknar á heilsugæslustöðvum höfuðborgarsvæðisins eru meðal þeirra sem fara fyrstir í verkfall. Í dag og á morgun mætir aðeins yfirlæknirinn til starfa og sinnir hann aðeins bráðatilfellum sem þola enga bið. Þetta geta til dæmis verið tilvik þar sem sjúklingur kemur á stöðina með verk fyrir brjósti eða mikla kviðverki.

„Eingöngu er sinnt erindum sem þola enga bið. Ef spurning er um líf og dauða þá sé ég fyrir mér að heimilislæknar á heilsugæslustöðvunum kæmu að því, en annars er starfsemin engin,“ segir Bjarni.

Þeir sem eiga erindi við hjúkrunarfræðinga, lífeindarfræðinga, heilsuvernd barna eða mæðraeftirlit fá þó sína þjónustu, en engum læknistengdum erindum er sinnt.

Þess má geta að læknavaktin á Smáratorgi er opin í dag frá 17 í dag líkt og aðra daga. Þá eru bráðamóttökur Landspítala opnar, en vakin hefur verið athygli á því að álag geti aukist á þessum stöðvum í dag og á morgun.