Morgunblaðið | 17.11.2014 | 13:09

Verkfallið bitnar á læknanemum

Á miðnætti hófst önnur lota verkfallsaðgerða Læknafélags Íslands. Morgunblaðið/Eggert

„Við erum svolítið á línunni. Auðvitað stöndum við með okkar verðandi stétt og vonum að þau semji, en aftur á móti viljum við líka standa vörð um kennsluna,“ segir Ragnhildur Hauksdóttir, formaður Félags læknanema í samtali við mbl.is.

Verkfallsaðgerðir Læknafélags Íslands hafa mikil áhrif á nemendur á fjórða, fimmta og sjötta ári í læknisfræði í Háskóla Íslands sem stunda verknám á Landspítalanum.

Að loknu þriggja ára bóknámi hefja nemendur á fjórða ári verknám á vöktum á spítalanum. Næstu þrjú árin fylgja þeir læknum á flestum deildum, læra og setja sig í verklegu hlið starfsins.

Á miðnætti hófst önnur lota verkfallsaðgerða Læknafélags Íslands. Læknar á kvenna- og barnasviði og læknar á rannsóknarsviði fara í tveggja sólarhringa verkfall og á sama tíma verða læknar á heilsugæslustöðvum og heilbrigðisstofnunum um landið í verkfalli. Á morgun hefjast einnig verkfallsaðgerðir lækna í Skurðlæknafélagi Íslands.

Getu lent í tvöföldu verkfalli

Þá daga sem boðað verkfall stendur yfir mega nemar á þeim deildum þar sem það stendur yfir ekki mæta á spítalann og fylgja læknunum, kennurum sínum. Öll kennsla þar sem sjúklingar koma nálægt er óheimil.

Ragnhildur segir verkfallið hafa mikil áhrif á nemana, sérstaklega þar sem nú líði brátt að lokum annarinnar. Í síðustu verkfallslotu, sem hófst þann 27. október, hafi próf frestast og áhyggjur þar af leiðandi skapast um framhaldið.

Verkfallsaðgerðir lækna eru þó ekki þær einu sem valda áhyggjum hjá læknanemum þessa dagana, en Félag prófessora við ríkisháskóla hafa einnig boðað til verkfalls. Ef af því verður mun það hafa mikil áhrif á prófatímabilið fyrir jólin, og eiga læknanemar því á hættu að próf þeirra frestist. „Það er yfirvofandi tvöfalt verkfall á okkur þessar vikurnar svo þetta er ansi flókin staða.“

„Gerum það sem við getum gert“

„Þegar það er verkfall á deild þá mætum við ekki, en við þurfum samt sem áður að klára öll verkefnin okkar og taka allar vaktir svo þetta er rosalega erfitt,“ segir Ragnhildur. Þá segir hún verknám á sumum deildum mjög stutt og því gefi að skilja að ef fólk missi úr heilu dagana þá missi það af ansi miklu efni.

Takist ekki að semja á tímabilinu sem verkfallsaðgerðirnar standa yfir gætu sumir nemanna misst um 40% tímans sem þau eiga að verja við verklegt nám á deildunum.

Ragnhildur segir læknanemana þó styðja læknana heilshugar í sinni kjarabaráttu, og leggi þeim lið að bestu getu. „Við gerum það meðal annars með því að verðandi læknakandídatar og læknanemar á fjórða og fimmta ári sem sinna stöðum á spítalanum á sumrin og eru í afleysingum á veturna, munu ekki ráða sig á spítalann næsta sumar ef samningar nást ekki fyrir þann tíma,“ segir hún. „Við gerum það sem við getum gert.“