Morgunblaðið | 24.11.2014 | 8:32 | Uppfært 8:50

Í dag: flæði- og aðgerðasvið

Í dag og á morgun standa verkfallsaðgerðir yfir á flæðisviði og aðgerðasviði. Golli / Kjartan Þorbjörnsson

Í dag og á morgun, 24. og 25. nóvember, munu verkfallsaðgerðir lækna standa yfir á aðgerðasviði og flæðisviði Landspítala. Öllum bráðatilfellum verður sinnt en gera má ráð fyrir að verkfallið hafi áhrif á alla aðra starfsemi, að því er fram kemur á vefsvæði Landspítala.

Undir flæðisvið falla m.a. bráðamóttaka, endurhæfingardeildir og öldrunardeildir, en aðgerðasviði tilheyra m.a. gjörgæsla, skurðstofur, speglanir, svæfing og blóðbanki.

Samkvæmt tilkynningu á vef LSH verða áhrif á flæðissviði þessi helst:

Bráðatilvikum verður sinnt en biðtími á bráðamóttöku fyrir þá sem hafa minniháttar áverka eða veikindi gæti lengst.
Bókaðar endurkomur á bráða- og göngudeild falla niður.
Fimm daga deild á Landakoti verður lokuð.
Klínísk kennsla fellur niður.
Starfsemi á Grensási mun að mestu haldast óbreytt.

Áhrif á aðgerðasviði:

(Starfsemi bráðalegudeilda verður eins og um helgar. Öllum bráðatilvikum verður sinnt eins og venjulega þessa verkfallsdaga)

Starfsemi á skurðstofum og svæfingardeildum miðast við bráðastarfsemi.
Ekki verður hægt að undirbúa sjúklinga fyrir aðgerð á innskriftarmiðstöð (10E og B3) verkfallsdagana. Símainnskrift svæfingarhjúkrunarfræðinga verður í eðlilegum farvegi.
Blóðbanki mun afgreiða allar bráðabeiðnir um blóð og blóðhluta 24. og 25. nóvember.
Valrannsóknir sem þarfnast svæfinga dagana 24. og 25. nóvember falla niður.
Aðgerðir tannlækna þriðjudaga falla niður vegna verkfalls svæfingarlækna.