Morgunblaðið | 8.12.2014 | 5:30 | Uppfært 7:00

Verkfall hófst á miðnætti

Verkfall hófst á miðnætti á heilsugæslustöðvum höfuðborgarsvæðisins, heilbrigðisstofnunum á landsbyggðinni og þremur sviðum Landspítalans. mbl.is/Ómar Óskarsson

Fundað var í kjaradeilu lækna í gær og lauk fundinum án niðurstöðu.

Í kjölfarið hófst verkfall, á miðnætti í nótt, á heilsugæslustöðvum höfuðborgarsvæðisins, heilbrigðisstofnunum á landsbyggðinni og þremur sviðum Landspítalans; aðgerðarsviði, rannsóknarsviði og kvenna- og barnasviði. Þessar verkfallsaðgerðir standa yfir í dag og á morgun.

Ríkissáttasemjari hefur boðað til nýs fundar í dag, sem gefur til kynna að eitthvað miðar þó í deilunni, að því er fram kemur í umfjöllun um mál þetta í Morgunblaðinu í dag.

Uppfært klukkan 6:55

Á vef Landspítalans kemur fram að á þeim deildum sem læknar eru í verkfalli gildi almennt að bráðatilvikum er sinnt venju samkvæmt á Landspítala alla verkfallsdaga en gera má ráð fyrir víðtækum áhrifum á almenna starfsemi spítalans. Vakin er athygli á því að vegna víðtækra verkfallsaðgerða á heilsugæslustöðvum má búast við auknu álagi á bráðamóttökur Landspítala.

Á rannsóknarsviði falla niður um 200 fyrirfram skipulagðar myndrannsóknir báða dagana en bráðaþjónustu er sinnt í myndgreiningu sem og annarri rannsóknarstarfsemi.

Vegna verkfalls svæfinga- og gjörgæslulækna á aðgerðasviði falla niður allar fyrirfram skipulagðar skurðaðgerðir en bráðatilvikum verður sinnt. Starfsemi á gjörgæsludeildum verður með nokkuð eðlilegum hætti enda öll starfsemi þar í eðli sínu bráð. Afgreiðsla á blóði og blóðhlutum verður með eðlilegum hætti en ekki verður hægt að sinna erindum eins og vefjaflokkunum og ýmis konar blóðrannsóknum nema erindin séu bráð.

Á kvenna- og barnasviði verður allri bráðaþjónustu sinnt og regluleg starfsemi annarra en lækna verður með hefðbundnum hætti (s.s. fósturgreiningar o.fl.). Göngudeild og dagdeild kvenlækninga verða lokaðar sem og göngudeild barna að mestu.