Morgunblaðið | 22.1.2015 | 8:54 | Uppfært 9:55

Með uppréttar hendur en samt skotinn

Lögreglumennirnir við bílinn. Skjáskot af Youtube

Búið er að birta myndband sem sýnir þegar lögreglumaður í New Jersey skýtur svartan mann til bana. Hann var þá að koma út úr bíl sínum með uppréttar hendur.

Jerame Reid var farþegi í bíl sem lögreglan stöðvaði fyrir að hafa ekið gegn stöðvunarskyldu án þess að hægja á sér.

Áður en lögreglan hleypir af skoti heyrist annar lögreglumaður segja að hann hafi séð byssu.

Bylgja mótmæla hefur verið í Bandaríkjunum undanfarna mánuði vegna fjölmargra mála þar sem hvítir lögreglumenn hafa skotið svarta, oft óvopnaða, karlmenn til bana. Einn þeirra lögreglumanna sem komu að málinu í Bridgeton í New Jersey er svartur segir í frétt BBC um málið.

Myndbandið sem er birt er tekið úr öryggismyndavél lögreglubíls. Á því má sjá lögreglumenn nálgast bílinn og einn þeirra segjast sjá byssu í hanskahólfinu.

Lögreglumaður heyrist kalla að Jerame Reid: „Ef þú teygir þig í eitthvað, þá verður þú drepinn.“

Lögreglumaðurinn teygir sig svo inn í bílinn og tekur út það sem virðist vera skammbyssa. Á sama tíma kemur Reid út úr bílnum, tómhentur, með uppréttar hendur.

Tveir lögreglumenn skutu á hann nokkrum skotum.

Atvikið átti sér stað hinn 30. desember.