Morgunblaðið | 4.3.2015 | 10:06

Kóparnir eins og pokar af beinum

Mynd 1 af 13 Veikur og vannærður sæljónskópur í Sjávarspendýramiðstöðinni í Kaliforníu. AFP

Mynd 2 af 13 Kóparnir eru margir hverjir svo horaðir og veikburða að þeir geta ekki étið sjálfir og þurfa að fá næringu í æð. Rifbeinin standa út úr litlum skrokknum. AFP

Mynd 3 af 13 Veikur og vannærður sæljónskópur í Sjávarspendýramiðstöðinni í Kaliforníu. AFP

Mynd 4 af 13 Dýralæknir skoðar heilsufar þessa litla kóps. AFP

Mynd 5 af 13 Kóparnir eru margir hverjir mjög máttfarnir enda vannærðir og sumir hverjir alvarlega veikir. Ekki er hægt að bjarga þeim öllum. AFP

Mynd 6 af 13 Þessi litli sæljónskópur er mjög vannærður. Hann er nú í umsjá dýralækna sem vona að hann hressist við matargjöf. AFP

Mynd 7 af 13 Dýralæknar sprauta næringu upp í kjaft kóps í Sjávarspendýramiðstöðinni. AFP

Mynd 8 af 13 Sumir kóparnir eru það sprækir að hægt er að gefa þeim sardínur að éta. AFP

Mynd 9 af 13 Mjög vannærður og veikur kópur fær aðhlynningu hjá dýralæknum. AFP

Mynd 10 af 13 Dýralæknarnir koma kópunum fyrir í búrum á milli þess sem þeim er gefin næring. AFP

Mynd 11 af 13 Kóparnir liggja máttvana í Sjávarspendýramiðstöðinni. AFP

Mynd 12 af 13 Yfir 160 kópar eru í Sjávarspendýramiðstöðinni. AFP

Mynd 13 af 13 Ekki er hægt að bjarga öllum kópunum. AFP

Fleiri hundruð vannærðum og veikum sæljónskópum hefur skolað á land í Kaliforníu. Þetta er þriðji veturinn í röð sem slíkt gerist. Dýrin eru mörg hver mjög horuð, líkust pokum af beinum.

Yfir 900 kópum hefur verið bjargað úr sjónum frá byrjun árs og þeim komið fyrir í dýraathvörfum víðsvegar um Kaliforníuríki þar sem hlúð er að þeim. Yfir 160 þeirra eru í umsjá Sjávarspendýramiðstöðvarinnar í Kaliforníu. Á degi hverjum koma allt að tíu kópar til miðstöðvarinnar og nú er útlit fyrir að bráðlega verði þar allt yfirfullt.

Sumir kópanna eru svo vannærðir að þeir hafa þurft að fá næringu í æð. Rifbeinin sjást greinilega, sem er óvenjulegt, þar sem þykkt fitulag hylur þau venjulega vandlega.

„Kóparnir verða viðskila við mæður sínar. Þeir eru vannærðir og horaðir, eins og pokar fullir af beinum,“ segir Shawn Johnson, yfirdýralæknir hjá Sjávarspendýramiðstöðinni.

Ekki er hægt að bjarga öllum kópunum. „Það er erfitt að koma hingað á morgnana og sjá að einhverjir hafa drepist um nóttina. Að þurfa að halda á nokkurra kílóa dauðum kópi niður í rannsóknarstofuna okkar er bara ... það er bara mjög erfitt.“

Í ár eru veiku kóparnir óvenjumargir. En hvað veldur? Í grein í Washington Post kemur fram að vísindamenn telji að hlýnun sjávar sé um að kenna. Hlýr sjórinn við strendurnar verður til þess að æti sæljónanna, m.a. sardínur, leitar dýpra í sjóinn. Mæður kópanna þurfa því að leita lengra eftir æti fyrir þá og skilja þá eftir á meðan. Þannig verða þeir viðskila við mæður sínar og tærast upp af vannæringu.