Morgunblaðið | 3.4.2015 | 9:14 | Uppfært 9:37

Íranir fögnuðu á götum úti

Fjölmargir Íranir söfnuðust saman á götum Teherans, höfuðborgar landsins, í nótt til að fagna samkomulaginu sem náðist í gær við stórveldin sex um kjarnorkuáætlun Írans. Fagnaðarlætin voru mikil og var utanríkisráðherra landsins, Javad Zarif, hylltur sem þjóðhetja.

Eins og kunnugt er náðist samkomulag um lykilþætti sem varða varanlegt samkomulag á milli Írana og sex stórvelda síðdegis í gær. Samkomulagið gengur út á að kjarnorkuáætlun Írana verði sett takmörk en á móti verði refsiaðgerðum gegn þeim aflétt.

Á meðal þess sem kemur fram í drögum að samkomulaginu er krafa um að Íranir dragi úr auðgun úrans um tvo þriðju og að úranbirgðir landsins verði í algjöru lágmarki. Öll kjarnorkuvinnsla Írana verður framvegis undir eftirliti Alþjóðakjarnorkumálastofnunarinnar.

Barack Obama, forseti Bandaríkjanna, hefur lýst yfir ánægju sinni með samkomulagið. Hann segist sannfærður um að það muni gera heiminn öruggari. Hann varaði þó við því að ef Íranar reyna að svíkjast um þá muni heimsbyggðin vita af því.

Frétt mbl.is: „Gerir heiminn öruggari“