Morgunblaðið | 9.4.2015 | 17:04 | Uppfært 17:50

Kvartað yfir lögreglumanninum 2013

Hér sést Walter Scott hlaupa undan lögreglumanninum sem skaut hann svo átta skotum. Skjáskot af Youtube

Árið 2013 barst formleg kvörtun vegna lögreglumannsins Michaels Slager fyrir árás í starfi. Nú hefur hann verið ákærður fyrir morð eftir að hann skaut óvopnaðan mann til bana á dögunum. Mun lögregla nú rannsaka málið, en í atvikinu árið 2013 var lögreglumaðurinn, Michael Slager, ásakaður um að nota rafbyssu á Mario Givens.

Hefur Slager nú verið ákærður fyrir morðið á Walter Scott, en Slager skaut hann átta sinnum er Scott reyndi að hlaupa burt frá lögreglumanninum. Hafa fjölmiðlar um allan heim birt myndskeið sem vitni að skotárásinni tók á farsíma. Segir sá sem tók myndbandið upp að mennirnir tveir hafi tekist á áður en Scott hljóp í burtu.

Slager hefur nú verið vikið úr starfi sínu í lögreglu Norður-Charleston í Suður-Karólínu-fylki Bandaríkjanna. Ef Slager verður fundinn sekur gæti hann þurft að sitja í fangelsi til æviloka.

Árið 2013 kvartaði Mario Givens formlega yfir Slager. Heldur hann því fram að Slager hafi þröngvað sér inn í hús hans eftir að hann bankaði þar upp á.

„Komdu út eða ég skýt þig með rafbyssu,“ á Slager að hafa sagt. Segist Givens hafa sett hendur sínar upp og yfir höfuð sitt. Þrátt fyrir það skaut Slager hann með rafbyssunni í magann.

Samkvæmt frétt BBC var Slager að rannsaka kvörtun gegn bróður Givens og á hann að hafa ruglast á Givens og bróður hans. Var ákæran felld niður og Slager hreinsaður af ásökununum í kjölfar lögreglurannsóknar.

Að sögn talsmanns lögreglunnar í Norður-Charleston, Spencer Pryor, verður málið rannsakað að nýju.