Morgunblaðið | 2.6.2015 | 9:47

Uber-bílstjóri kærður fyrir áreiti

AFP

Lögreglan í Nýju-Delí hefur handtekið leigubílstjóra á vegum Uber en hann er sakaður um að hafa beitt konu kynferðislegu ofbeldi. Ekki eru nema nokkrir mánuðir síðan hávær umræða var um að banna starfsemi Uber á Indlandi.

Fórnarlambið sakar manninn um að hafa kysst hana án hennar vilja eftir að hafa ekið henni í Gurgaon borg, skammt frá Nýju-Delí.

Í desember í fyrra var bílstjóri Uber handtekinn í Nýju-Delí eftir að hafa verið sakaður um að nauðga ungri konu.

Að sögn fórnarlambsins sofnaði hún í leigubílnum á heimleið úr matarboði. Þegar hún vaknaði hafði bílstjórinn lagt leigubílnum á afviknum stað og þar réðst hann á konuna og nauðgaði henni áður en hann henti henni út úr bílnum, skammt frá heimili hennar í norðurhluta borgarinnar.

Uber rak leigubílstjórann frá störfum en hjá Uber tengjast bílstjóri og farþegi saman í gegnum smáforrit. Það er þú pantar bíl hjá Uber í gegnum smáforrit.