Morgunblaðið | 8.6.2015 | 19:08

Lögreglumaðurinn verður ákærður

Hér sést Walter Scott hlaupa undan lögreglumanninum sem skaut hann svo átta skotum. Skjáskot af Youtube

Kviðdómur í South Carolina fylki í Bandaríkjunum tilkynnti formlega í dag að fyrrum lögreglumaður, sem skaut óvopnaðan svartan mann til bana í apríl, verði ákærður fyrir morð.

NBC greinir frá þessu.

Það vakti heimsathygli þegar að lögreglumaðurinn Michael Slager skaut Walter Scott átta sinnum í North Charleston þann 4. apríl. Atvikið náðist á myndskeið en á því má sjá Scott hlaupa í burtu frá Slager áður en hann skaut hann.

Scarlett Wilson, saksóknari í fylkinu, tilkynnti í dag ákvörðun kviðdómsins.

Slager hélt því fyrst fram að Scott hafi gripið í rafbyssu hans við umferðarljós. En myndband sem tekið var upp af sjónarvotti sýnir Scott og Slager ræða saman og Scott hlaupa í burtu. Þá skýtur Slager hann átta sinnum, úr töluverði fjarlægð.

Lögregluofbeldi í Bandaríkjunum hefur verið heitt umræðuefni síðustu mánuðina. Fjölmörg mótmæli og fjöldafundir hafa átt sér stað í Bandaríkjunum síðasta árið þar sem dauðsföllum svartra af völdum hvítra lögreglumanna er mótmælt harðlega.