Morgunblaðið | 25.6.2015 | 10:22

Rögnunefndin skilar skýrslu eftir hádegi

Frá Reykjavíkurflugvelli. mbl.is/Árni Sæberg

Rögnunefndin svokallaða, sem nefnd er eftir Rögnu Árnadóttur formanni nefndarinnar, mun skila skýrslu sinni og niðurstöðum eftir hádegi í dag. Er um að ræða stýrihóp um sameiginlega athugun ríkis, Reykjavíkurborgar og Icelandair Group á flugvallarkostum á höfuðborgarsvæðinu.

Upphaflega átti hópurinn að skila skýrslu sinni fyrir síðustu áramót en nefndin fékk hins vegar frest til 1. júní sl. Átti nefndin þá að skila skýrslu sinni og niðurstöðum 15. júní sl.

Í samtali við mbl.is segir Ragna Árnadóttir nefndina koma til með að skila niðurstöðum sínum eftir hádegi í dag. Verður skýrslan hins vegar ekki kynnt sérstaklega á blaðamannafundi.