Morgunblaðið | 26.6.2015 | 15:40

Ekkert erindi borist bæjarstjórn

Vogar á Vatnsleysuströnd. Ljósmynd/Vogar

„Okkur hefur nú ekki borist neitt erindi vegna þessa máls, hvorki formlegt né óformlegt,“ segir Ingþór Guðmundsson, forseti bæjarstjórnar í Vogum á Vatnsleysuströnd, í samtali við mbl.is og vísar í máli sínu til vinnu stýrihóps ríkis, Reykjavíkurborgar og Icelandair.

Fram kemur meðal annars í niðurstöðum hópsins það álit að Hvassahraun, sem er að hluta í landi Voga á Vatnsleysuströnd, sé besti kosturinn fyrir nýjan innanlandsflugvöll, en nefndinni var falið að kanna aðra kosti en Reykjavíkurflugvöll í Vatnsmýri.

Hugsanlegt flugvallarstæði í Hvassahrauni er einnig inni á landi sem tilheyrir Hafnarfirði. Hefur Haraldur L. Haraldsson, bæjarstjóri í Hafnarfirði, lýst því yfir að hann muni kalla stýrinefndina á fund bæjarráðs til þess að kynna skýrsluna og svara spurningum.

Aðspurður segir Ingþór það einnig koma til greina.

„Við kláruðum í þessari viku okkar síðasta bæjarstjórnarfund fyrir sumarfrí en bæjarráð kemur saman reglulega og því er ekki ólíklegt að við gerum eins,“ segir hann.