Morgunblaðið | 6.8.2015 | 18:36

Styðja áfram refsiaðgerðir gegn Rússum

Gunnar Bragi Sveinsson utanríkisráðherra. mbl.is/Styrmir Kári

Gunnar Bragi Sveinsson utanríkisráðherra segir að íslensk stjórnvöld muni áfram styðja refsiaðgerðir gegn Rússum, þrátt fyrir áætlanir þeirra um að banna innflutning á matvælum frá Íslandi.

Þetta kom fram í sexfréttum Rásar 2.

Utanríkismálanefnd Alþingis fundaði um málið síðdegis í dag og lýsti yfir stuðningi við afstöðu íslenskra stjórnvalda.

Gunnar Bragi sagði að það hefði ekki verið rætt á fundinum að draga stuðning Íslands við refsiaðgerðir Evrópusambandsins gegn Rússum til baka.

„Þvert á móti var umræðan þannig almennt á fundinum að það er stuðningur við að halda óbreyttri stefnu í málinu. Auðvitað höfum við þó öll miklar áhyggjur af því hvað gerist ef að þessir markaðir lokast. Það hafa gríðarleg áhrif. Það er alveg ljóst,“ sagði hann.