Morgunblaðið | 13.8.2015 | 18:49

Smábátaeigendur áhyggjufullir

Landssamband smábátaeigenda segist áhyggjufullt yfir stöðunni sem upp er komin. mbl.is/Sigurður Bogi Sævarsson

Stjórn Landssambands smábátaeigenda lýsir miklum áhyggjum vegna ákvörðunar Rússa að setja viðskiptabann á vörur frá Íslandi og í yfirlýsingu frá samtökunum er vísað til þess að þau vöruðu við stöðunni fyrir ári síðan. Þá var gagnrýnt að ekki væri haft samráð við söluaðila sjávarafurða þegar utanríkisráðherra heimsótti Úkraínu í miðju átakanna 2014.

Vísað er til þess að yfirlýsingar hafi þá verið gefnar sem ljóst var að hefðu áhrif á áratuga viðskipti við vinaþjóð Íslendinga – Rússland. Landssambandið hvatti þá til að varlega yrði farið í þessum málum því gríðarlegir hagsmunir væru þar undir.

Segir í tilkynningunni að Íslendingar hafi þá sloppið, en nú hafi mál þróast á verri veg. „Íslendingar sluppu það sinnið við að lenda á lista yfir þjóðir sem Rússar settu viðskiptabann á. Því miður hafa þessi mál þróast á enn verri veg, þar sem eitt verðmætasta viðskiptasamband þjóðarinnar er í uppnámi. Verðmæti markaðarins telur í tugum milljarða.“

Þá er bent á að ríkisstjórnin hafi enn ekki komið saman til að ræða þá stöðu sem upp er komin. „Það er Landssambandi smábátaeigenda verulegt áhyggjuefni að upplifa bóltöku í þessu mikilvæga málefni,“ segir í tilkynningunni og bætt er við: „Landssamband smábátaeigenda hvetur stjórn og stjórnarandstöðu að taka höndum saman og gera allt sem í þeirra valdi er til að endurheimta viðskiptasambönd við Rússland. LS vísar til góðra samskipta sem skapast hafa milli þjóðhöfðingja þessara grónu vinaþjóða við að finna lausn á þeirri alvarlegu stöðu sem málið er komið í.“