Guðrún Bergmann og Gunnar Már Sigfússon slógu í gegn í Tjarnarbíói í gær þar sem þau fræddu lesendur Smartlands um sykurleysi og hvers vegna sykur fitar okkur. Á hádegisfundi sem haldinn var í Tjarnarbíói í tilefni af Sykurlausum september á Smartlandi Mörtu Maríu héldu þau fróðleg erindi og tóku sitthvort pólinn í hæðina.
Guðrún talaði um Candida-sveppinn og áhrif sykurfíknar á hann. Sveppurinn festir rótum í þörmunum og blómstrar ef fólk borðar nægilega mikið af sykri. Hún skrifaði bókina um Candida-sveppinn ásamt lækninum Hallgrími Magnússyni heitnum. Bókin kom fyrst út 1993 og hefur síðan þá verið endurprentuð nokkrum sinnum. Guðrún skrifar reglulega pistla um heilsu á Smartland Mörtu Maríu.
Gunnar Már er einn þekktasti einkaþjálfari landsins. Hann hefur stúderað mataræði ofan í kjölinn enda veit hann að æfingar einar og sér skila litlu ef mataræði er ekki til fyrirmyndar. Gunnar Már skrifaði metsölubækurnar um LKL mataræðið og upp á síðkastið hefur hann hjálpað fólki að hætta að borða sykur.
Erindi Guðrúnar og Gunnars Más verða aðgengileg á Smartlandi Mörtu Maríu eftir helgi. Þeir sem hafa áhuga á að reyna að bæta lífsvenjur sínar ættu að fylgjast með Sykurlausum september því allan mánuðinn verður daglegur fróðleikur um sykurleysi og hús tekið á fólki sem hefur reynslu af því að henda sykrinum út úr mataræði sínu.