Morgunblaðið | 12.11.2015 | 11:38 | Uppfært 12:43

Leggur kæruna fram í dag

Vilhjálmur H. Vilhjálmsson, verjandi annars mannsins sem sakaður er um kynferðisbrot gegn tveimur konum. mbl.is/Sigurgeir

Jóhanna Sigurjónsdóttir, lögmaður tveggja kvenna sem báðar lögðu fram kæru vegna meints kynferðisbrots í október, mun leggja fram kæru á hendur Vilhjálmi H. Vilhjálmssyni, lögmanni annars meintra gerenda síðar í dag.

Ríkisútvarpið greindi frá því í gær að hún teldi hann hafa brotið gegn lagagreinum nokkurra lagabálka, sem og starfsskyldum sínum sem lögmaður og siðareglum lögmanna.

Síðar um daginn fór Vilhjálmur fram á afsökunarbeiðni frá Jóhönnu og sagðist hann þá myndu fyrirgefa henni með bros á vör.

Þegar mbl.is hafði samband við Jóhönnu í morgun var kæran enn í vinnslu og fengust ekki upplýsingar um númer þeirra lagagreina sem hún telur Vilhjálm hafa brotið gegn. Hér að neðan verður atburðarás gærdagsins tekin saman en ýmislegt fór á milli lögmannanna tveggja.

Umfjöllun Fréttablaðsins hafi skaðað málið?

RÚV greindi frá því um hádegi í gær að Jóhanna teldi Vilhjám hafa brotið gegn starfsskyldum sínum sem lögmaður, gegn ákvæðum almennra hegningarlaga, gegn ákvæðum um meðferð sakamála, gegn ákvæðum laga um lögmenn og einnig gegn siðareglum lögmanna.

Sagði hún að opinber umfjöllun um kynferðisbrot sé brotaþolum þungbær en í þessu máli hafi verið gefnar ítarlegar atvikalýsingar, hvort sem þær séu réttar eða rangar. Þá sagði Jóhanna einnig: „Fari svo að þessi umfjöllun Fréttablaðsins hafi skaðað málið, eða kunni að skaða málið, þá þurfa fjölmiðlar auðvitað að draga lærdóm af því.“

Í samtali við mbl.is sagði Jóhanna alvarlegt að lögmaður annars mannsins hafi upplýst fjölmiðla um viðkvæmt efnisatriði kærunnar þar sem málið sé enn til rannsóknar hjá lögreglu. Þá velti hún einnig fyrir sér hvort framganga Vilhjálms hefði skaðað málið og bætti við: „En maður spyr sig hvort það sé hætta á því að svona nákvæm umfjöllun um mál sem enn er til rannsóknar kunni hugsanlega að skaða framgöngu málsins,“ sagði Jóhanna.

„Gerum jú öll mistök í lífinu“

Í kjölfarið skoraði Vilhjálmur á Jóhönnu að biðja hann þegar í stað afsökunar. „Ég skora á Jóhönnu að biðjast þegar í stað afsökunar á þessu frumhlaupi sínu og mun ég þá fyrirgefa henni með bros á vör. Við gerum jú öll mistök í lífinu,“ segir í svari Vilhjálms til Jóhönnu sem hann sendi mbl.is í gegnum tölvupóst.

Í svarinu segir hann einnig að það sjái hver heilvita maður að hann geti ekki verið heimildarmaður Fréttablaðsins. Segist hann ekki hafa haft vitneskju um málið fyrr en hann var ráðinn til að gæta hagsmuna annars kærðu á mánudag kl. 17.

Þá hafi Fréttablaðið þegar verið búið að birta forsíðufrétt sína um íbúðina. Í öðru lagi sjáist það á fréttinni sem birtist í morgun að blaðamaður Fréttablaðsins hafi hringt í hann í gær til að bera hana undir hann og þar hafi hann vísað því á bug að hún sé sannleikanum samkvæmt.

„Í þriðja lagi er ég búinn að vera í öllum fjölmiðlum að bera fréttflutning Fréttablaðsins til baka og segja að hann sé rangur. Hvers vegna í ósköpum ætti ég líka að fóðra Fréttablaðið á upplýsingum/gögnum sem koma umbj. mínum illa.

Þessi málatilbúnaður Jóhönnu Sigurjónsdóttur dæmir sig því sjálfur auk þess sem þetta er órökstuddar dylgjur sem eiga sér enga stoð í þeim lagabálkum sem hún vísar til, enda getur hún það ekki því það hafa engin lög verið brotin,“ sagði í svari Vilhjálms.

Snýst ekki um heimildarmann Fréttablaðsins

Í samtali við mbl.is sagði Jóhanna aftur á móti að fyrirhuguð kæra snúist hreint ekki um heimildarmann Fréttablaðsins heldur um ummæli sem Vilhjálmur hefur látið falla í fjölmiðlum undir nafni, sem lögmaður annars ákærðu, eftir að fyrstu fréttir af málinu tóku að berast.

mbl.is ræddi í kjölfarið við Vilhjálm sem sagðist standa við fyrra svar sitt.

„Og við hvaða ákvæði almennra hegningarlaga, laga um meðferð sakamála, lögmannalaga, eða siðaregla lögmanna varðar þetta? Ég hef ekki hugmynd um það? Svo ég get ekkert svarað fyrir það. Ég get bara svarað fyrir það sem hún segir. Hún talar um Fréttablaðið og þangað til þá stendur þetta svar.“

Segist Vilhjálmur telja það lágmarkskröfu til lögmanns sem ásakar einhvern um refsiverða háttsemi að viðkomandi heimfæri hana á refsiákvæði og geri grein fyrir hvaða lagaákvæði hafi verið brotin.

„Að endingu, af því að Álafossúlpunni er svo annt um hugtakið þöggun, ég held að þetta sé ein versta tegund af þöggun sem ég hef orðið vitni að. Að það megi ekki halda uppi vörnum fyrir sakaðan mann sem er borinn röngum sökum í fjölmiðlum,“ sagði Vilhjálmur í samtali við mbl.is.