Morgunblaðið | 16.11.2015 | 15:09 | Uppfært 4.8.2016 17:02

Í 14 mánaða fangelsi fyrir hótanir

Í ákærunni voru talin upp rúmlega 50 skilaboð sem Erlendur sendi á tímabilinu. Morgunblaðið/Ernir

Héraðsdómur Norðurlands eystra hefur dæmt Erlend Eysteinsson í 14 mánaða fangelsi fyrir ítrekaðar hótanir í garð fyrrum sambýliskonu sinnar, Ásdísar Viðarsdóttur. Áður hefur verið fjallað ítarlega um mál þetta eftir að Ásdís sagði sögu sína í Kastljósi Ríkisútvarpsins í maí árið 2014.

Sjá frétt mbl.is: „Hann ætlar að láta mig borga“

Erlendur var ákærður í septembermánuði fyrir að hafa á tímabilinu 3. júlí til 15. ágúst árið 2015 margítrekað sent Ásdísi hótanir í textaskilaboðum. Segir í niðurstöðum dómsins að sum skilaboðin hafi verið til þess fallin að vekja hjá brotaþola ótta um líf, heilbrigði eða velferð sína.

Í ákærunni voru talin upp rúmlega 50 skilaboð sem Erlendur sendi Ásdísi á tímabilinu. Viðurkenndi hann fyrir dómi að hafa sent skilaboðin en fullyrti á sama tíma að ekki væri um hótanir að ræða. Segir hann í skýrslu fyrir dómi að fyrir sér hafi aðeins vakað að fá föðurarf sinn frá brotaþola, og vísaði hann þar til stóls sem verið hefði í eigu föður hans.

Meðal þeirra skilaboða, þar sem ekki þótti leika vafi á um að þar væri hótað refsiverðri meingerð eru til dæmis eftirfarandi:

„Or shall one be haunted for the rest of his/her life?“
„Honteted for the years to come.“
„Rest of life.“
„Þar til ég dey.“

Erlendi hefur enn fremur verið gert að greiða málsvarnarlaun skipaðs verjanda síns, Vilhjálms H. Vilhjálmssonar hæstaréttarlögmanns, sem nema rúmlega 400 þúsund krónum.

Héraðsdómur Norðurlands eystra úrskurðaði Erlend í nálgunarbann til sex mánaða í september síðastliðnum, eftir ítrekaðar hótanir hans í garð Ásdísar.

Ásdís krafðist nálgunarbannsins í júlí en þar sem málið gleymdist var kröfunni vísað frá þegar lögreglan fór loks fram á nálgunarbann í ágúst. Héraðsdómur sagði þá að lögreglan hefði lagt fram kröfuna of seint. Hæstiréttur vísaði svo kröfunni um nálgunarbann aftur heim í hérað og þá fékkst loks nálgunarbannið.

Sjá frétt mbl.is: „Þetta var bara klúður“