Einkaþota Volkswagen verður seld og áhersla verður lögð á auðmýkt. Rannsókn á svindlbúnaðarhneykslinu stendur nú yfir og voru fyrstu niðurstöður kynntar á blaðamannafundi í dag.
Þar kom fram að búnaðinum hefði verið komið fyrir í bílum til þess að svindla á prófunum þar sem aðrar lausnir voru ekki tækar innan þess tíma- og fjárhagsramma sem starfsmönnum var gefinn. „Við erum ekki að tala um einstaka mistök heldur keðju þeirra,“ sagði Hans Dieter Pötsch, stjórnarmaður VW á fundinum í dag.
Á fundinum kom fram að hjá VW hefði ríkt andrúmsloft þar sem brot voru umborin.
Pötsch sagðist þó ekki vita hver hinn ábyrgi væri né heldur hversu langt hneykslið teygði sig upp innan fyrirtækisins. Hann sagði þó að tiltölulega fáir starfsmenn hefðu verið viðriðnir málið. Þá gæfi ekkert til kynna að stjórn fyrirtækisins hefði vitað að þessu.
Jones Day, bandaríska lögmannsstofan sem sér um rannsóknina, mun líklega ljúka vinnunni á næsta ári.
Pötsch sagði að koma þyrfti í veg fyrir að eitthvað álíka endurtaki sig. Utanaðkomandi aðili mun í framtíðinni sjá um prófanir hjá fyrirtækinu og breytingar hafa verið gerðar á stjórninni. Sex nýir stjórnarmenn hafa gengið til liðs við VW og sjö nýir framkvæmdastjórar.
Ekki stendur til að selja einstaka hluta samstæðunnar til þess að mæta kostnaði vegna málsins. Pötsch sagði þó að áhersla yrði lögð á auðmýkt á bílasýningum og annars staðar og verður Airbus einkaþota félagsins seld.