Morgunblaðið | 20.1.2016 | 5:54 | Uppfært 10:12

Kona handtekin fyrir heimilisofbeldi

mbl.is/Eggert Jóhannesson

Lögreglan handtók konu í Grafarholti um eittleytið í nótt en hún er grunuð um heimilisofbeldi. Eins er hún grunuð um akstur bifreiðar undir áhrifum áfengis og/eða fíkniefna og vörslu fíkniefna. Samkvæmt upplýsingum frá lögreglu gistir konan fangageymslu fyrir rannsókn máls.

Maður í annarlegu ástandi var handtekinn í iðnaðarhúsnæði í Árbæjarhverfi á tólfta tímanum í gærkvöldi en eldur var í húsinu. Hann gistir fangageymslu vegna rannsókn málsins.

Lögreglan hafði afskipti af manni sem sat í bifreið í bílastæðahúsi í Kópavogi en maðurinn er grunaður um vörslu og meðferð fíkniefna.

Um hálfsexleytið í gær hafði lögregla afskipti af manni á heimili í austurhluta Reykjavíkur vegna vörslu fíkniefna.

Ölvaður ökumaður var síðan stöðvaður í Grafarvoginum um hálftvöleytið í nótt og komið í veg fyrir að hann héldi för sinni áfram undir stýri bifreiðar.