Morgunblaðið | 22.1.2016 | 6:22 | Uppfært 9:28

Lögreglumaður fékk 263 ára dóm

Ofbeldi gagnvart svörtu fólki af hálfu hvítra lögreglumanna í Bandaríkjunum hefur vakið mikla reiði meðal almennings. AFP

Fyrrverandi lögreglumaður í Oklahomaríki var í gær dæmdur í 263 ára fangelsi fyrir að hafa nauðgað og beitt svartar konur kynferðislegu ofbeldi er hann sinnti skyldustörfum.

Daniel Holtzclaw, sem er 29 ára gamall hvítur lögreglumaður, var í desember fundinn sekur um nauðgun og að hafa neytt konur til munnmaka. Alls var hann dæmdur fyrir 18 af 36 ákæruliðum. Dómari kvað upp refsinguna í gær og er hún í samræmi við það sem kviðdómur lagði til, það er 263 ára fangelsi.

Verjandi Holtzclaws, Scott Adams, segir að niðurstaðan hafi ekki komið á óvart enda í samræmi við það sem lagt var til í desember.

Að sögn saksóknara réðst Holtzclaw á svartar konur í fátækrahverfum Oklahomaborgar frá því seint á árinu 2013 fram á mitt ár 2014.

Kona á sextugsaldri er ein þeirra kvenna sem báru vitni í málinu. Hún segir að þegar hún var á heimleið akandi seint um kvöld hafi Holtzclaw gefið sér merki um að nema staðar. Hann spurði hvort hún hefði verið að drekka áfengi og skipaði henni að koma yfir í lögreglubílinn. Þar neyddi hann hana til munnmaka.

Annað fórnarlamb hans, 17 ára gömul stúlka, segir að Holtzclaw hafi boðið sér far þegar hún var á heimleið gangandi að kvöldlagi. Hann hafi sagt henni að hann þyrfti að leita á henni, neytt hana úr fötunum og nauðgað henni.

Lögfræðingur Holtzclaws hélt því fram við réttarhöldin að skjólstæðingur hans hefði verið að reyna að aðstoða eiturlyfjafíkla og vændiskonur sem hann hitti í starfi sínu í fátækrahverfinu. Margar kvennanna eru á sakaskrá fyrir neyslu fíkniefna.

Frétt mbl.is: Lögreglumaður nauðgaði átta konum