Morgunblaðið | 23.5.2016 | 15:21

Láti reyna á markaðsvirði krónunnar

Þorsteinn Víglundsson, framkvæmdastjóri Samtaka atvinnulífsins. mbl.is/Ómar Óskarsson

Þorsteinn Víglundsson, framkvæmdastjóri Samtaka atvinnulífsins, telur mikilvægt að stjórnvöld sýni nú hugrekki, losi gjaldeyrishöftin eins mikið og unnt er og láti reyna á raunverulegt markaðsvirði krónunnar. Annað myndi skjóta skökku við.

Í samtali við mbl.is fagnar Þorsteinn því að Alþingi hafi samþykkt aflandskrónufrumvarpið svonefnda og hafi nú lokið þeirri lagasetningu sem þurfti að ljúka í aðdraganda fyrirhugaðs útboðs á aflandskrónum, sem til stendur að halda í næsta mánuði. Útboðið sé lokahnykkurinn áður en hægt verður að losa höftin.

„Við hefðum viljað sjá þetta gerast mun fyrr. Okkur þótti verða of mikill dráttur á þessum áfanga en engu að síður er mjög ánægjulegt að sjá að mönnum er nú ekkert að vanbúnaði að ráðast í útboðið og þá í beinu framhaldi af því í myndarlega losun á höftunum.

Aðstæður í þjóðfélaginu eru eins og best verður á kosið til þess að ráðast í losunarferlið. Það er mjög mikilvægt að stjórnvöld sýni hugrekki í því, með svo sterkt gjaldeyrisinnstreymi eins og raunin er vegna góðrar stöðu útflutningsatvinnuveganna, að reyna að losa höftin eins mikið og unnt er og láta reyna á raunverulegt markaðsvirði krónunnar við þessar aðstæður,“ nefnir hann.

Það myndi skjóta skökku við að hafa víðtæk höft á gjaldeyrisútflæði á sama tíma og hagkerfið sé, ef eitthvað er, að glíma við vanda vegna gjaldeyrisinnflæðis og „óþægilega mikla styrkingu krónunnar“.

„Við erum meðal annars að sjá vaxtamunarviðskipti taka við sér á nýjan leik. Við þessar kringumstæður er full ástæða til að afnema allar þær hindranir sem eru á eðlilegu fjármagnsflæði milli landa.“

Uggandi yfir gengisstyrkingunni

Aðspurður segir Þorsteinn það ekkert launungarmál „að við erum nokkuð uggandi yfir þessari miklu styrkingu sem hefur orðið á krónunni á undanförnu ári, samhliða þessu gríðarlega sterka innflæði. Það grefur að mörgu leyti undan samkeppnisstöðu okkar helstu útflutningsatvinnuvega. Svo má ekki gleyma því að ástæða þess að við erum í svo sterkri stöðu efnahagslega er einmitt þessi góði gangur í útflutningsgreinunum okkar, meira og minna öllum, og það er mikilvægt að verja þar af leiðandi samkeppnisstöðu þeirra fram á veginn svo það komi ekki eitthvert bakslag.

Þess vegna er afar brýnt að ganga hratt og örugglega til verks um losun haftanna.“

Aðstæður til losunar hafta hafa sjaldan verið betri. mbl.is/Árni Sæberg

Hann segir gjarnan rætt um það í tengslum við áform stjórnvalda að lífeyrissjóðir muni áfram búa við umfangsmiklar takmarkanir á fjárfestingum sínum. „Við teljum ekki ástæðu til þess.“

Þvert á móti sé nauðsynlegt að leyfa lífeyrissjóðunum að auka erlendar fjárfestingar sínar, sér í lagi við núverandi kringumstæður. Það snerti heilbrigði lífeyriskerfisins til lengri tíma litið. Þeir verði að fá að sitja við sama borð og aðrir fjárfestar þegar höftin verða losuð.