Morgunblaðið | 16.7.2016 | 10:24 | Uppfært 10:41

Fjöldi Íslendinga í Tyrklandi

Mótmælendur í Antalya. /AFP

179 Íslendingar eru staddir í sólarlandaferð í Tyrklandi á vegum ferðaskrifstofunnar Nazar. Þar af eru 49 börn í hópnum. Þetta kemur fram í frétt á vefnum turisti.is. Ferðamennirnir eru staddir í strandbæjunum við Antalya við suðausturströnd Tyrklands í um 700 km fjarlægð frá Istanbúl og tæpa 500 km frá Ankara.

Mikill óróleiki er nú í Tyrklandi þar sem tilraun var gerð til valdaráns í gærkvöld.

Búist er við að heimferð íslenskra ferðamanna frá Antalya verði samkvæmt áætlun á miðvikudag. Nazar er eina ferðaskrifstofan sem býður upp á sólarlandaferðir til Tyrklands að því er fram kemur í fréttinni.

Kemal Yamanlar, framkvæmdastjóri Nazar, er staddur í Tyrklandi en í samtali við Túrista segir hann farþega Nazar ekki vera órólega vegna atburðanna í landinu, lífið á ferðamannasvæðunum gangi sinn vanagang.

Ekki hefur komið til neinna átaka á svæðinu en Yamanlar útilokar þó ekki að mótmæli hafi brotist út á einhverjum stöðum. Flug liggur enn þá niðri en vonast er til að samgöngur komist í lag fljótt og að flugið til Íslands verði samkvæmt áætlun á miðvikudag. Ekki er þó hægt að segja til með vissu um hvenær flugvellir verði opnaðir á nýjan leik.