Morgunblaðið | 20.7.2016 | 8:13 | Uppfært 8:59

Loka fyrir Wikileaks í Tyrklandi

AFP

Tyrknesk stjórnvöld lokuðu fyrir aðgang að vefsíðu WikiLeaks í morgun, aðeins nokkrum klukkustundum eftir að samtökin opinberuðu þúsundir skjala er varða ráðandi öfl landsins.

Um er að ræða næstum því 300 þúsund tölvupósta er varða Jafnréttis- og þróunarflokk Receps Tayyips Erdogans, forseta landsins, AK-flokkinn. Tölvupóstarnir ná frá árinu 2010 til 6. júní á þessu ári.

Wikileaks fengu gögnin í sínar hendur áður en valdaránstilraunin var gerð í landinu á föstudag, en í yfirlýsingu sögðu samtökin að birting þeirra væri svar við pólitískum hreinsunum stjórnvalda í kjölfar tilraunarinnar.

Um fimmtíu þúsund hermenn, lögregluþjónar, dómarar og kennarar hafa verið reknir eða handteknir í kjölfar tilraunarinnar misheppnuðu.

Heimildarmaður Wikileaks er ekki sagður tengjast uppreisnarmönnunum, tyrknesku stjórnarandstöðunni eða stjórnvöldum, að sögn samtakanna.

Fyrir birtingu gagnanna höfðu samtökin bent á að tyrknesk stjórnvöld myndu líklegast ritskoða þau. Voru netnotendur því hvattir til þess að nota krókaleiðir til að skoða gögnin, þá sérstaklega Torrent-tæknina.

RELEASE: 294,548 emails from Turkey's ruling political party, Erdoğan's AKP #AKPemails https://t.co/1Yof7YZpH7 pic.twitter.com/vFw8KLMIsX
— WikiLeaks (@wikileaks) July 20, 2016