Morgunblaðið | 22.7.2016 | 14:55 | Uppfært 20:42

SÞ aðstoða Tyrki í ferðamálum

Stuðningsmenn Erdogan veifa tyrkneska fánanum í fjöldagöngu við Bosphorus-brúna í Istanbúl í gær. AFP

Alþjóðaferðamálastofnun Sameinuðu þjóðanna hefur undirritað samkomulag við Tyrkland um að hjálpa landinu við að auka ferðamannastrauminn til landsins.

Mikið hefur gengið á í Tyrklandi að undanförnu. Tíðar sjálfsmorðssprengjuárásir hafa verið gerðar undanfarið ár, þar á meðal á flugvellinum í Istanbúl, og núna síðast misheppnuð valdaránstilraun.

Stofnunin, sem er staðsett í Madrid á Spáni, mun miðla sérfræðiþekkingu sinni í til tyrkneskra stjórnvalda í stefnumótum, samskiptum og markaðsmálum.

Stofnunin mun einnig aðstoða Tyrki við að fjölga flugferðum frá lykilmörkuðum í Evrópu.

Taleb Rifai á blaðamannafundi. AFP

Almenningur sýndi hugrekki

„Tyrkland skiptir okkur miklu máli,“ sagði Taleb Rifai, framkvæmdastjóri Alþjóðaferðamálastofnunarinnar, eftir að samkomulagið var í höfn.

„Almenningur í Tyrklandi brást við af hugrekki þegar hann varði lýðræði landsins í síðustu viku. Okkar verkefni í dag er að sýna stuðning okkar í verki með því að styðja við bakið á einum mikilvægasta iðnaðinum í landinu, sem er ferðamálaiðnaðurinn. Saman viljum við senda heiminum skilaboð um að Tyrkland sé mætt aftur og tilbúið til að taka á móti gestum,“ sagði Rifai.

Stuðningsmenn Erdogan veifa tyrkneska fánanum í fjöldagöngu við Bosphorus-brúna í Instanbúl í gær. AFP

Átta prósent í ferðamannaiðnaði

Helstu borgir Tyrklands breyttust í vígvelli 15. júlí þegar misheppnuð valdaránstilraun sem var beint gegn forsetanum Recep Tayyip Erdogan mistókst.

Tilraunin hefur grafið undan ferðamannaiðnaðinum í Tyrklandi. Áður höfðu sprengjuárásir skotið ferðamönnum skelk í bringu, þar á meðal ein í júní þegar 47 manns létust á aðalflugvellinum í Istanbúl.

Um átta prósent af vinnuafli Tyrkja starfa í ferðamannaiðnaðinum.